Christophe til Tsjekkia

Christophe Psyché er klar for den tsjekkiske klubben Baník Ostrava. Den solide franskmannen har signert ein kontrakt som går dei neste 2,5 åra.

Baník Ostrava spelar i den øvste ligaen i Tsjekkia. Laget ligg utsett til på tabellen, men får no inn ein kar som toppar Bra Mann-skalaen.

Etter debuten mot Odd i juli 2014 har Christophe spelt 79 kampar og skåra 7 mål i kvitedrakta. Han har vore ein særs lojal og god spelar for oss, ikkje berre på, men også utanfor bana.

Hans beste sesong var i 2016, då han vart kåra til Årets Spelar i Sogn Avis.

Christophe fekk 2017 oppstykka av skader. Først kom han seint i gong grunna eit brot i bekkenet, deretter fekk han ein skade i achilles som gjorde at han mista heile haustsesongen, som var den siste i den kontraktsperioden.

Med familien i Belgia og mange år i Norge, låg det litt i korta at han ville reisa etter sesongslutt, men so vart det skrive ny kontrakt for årets sesong i oktober.

- Christophe har vore ein lojal og særs god spelar i kvitedrakta, det er difor litt trist at han no reiser frå oss. Samstundes er me veldig glade for at han går til ein klubb i den tsjekkiske toppdivisjonen, der han får sjansen til å utvikla seg vidare som fotballspelar, seier sportsleg leiar Håvard Flo.

Christophe brukte hausten i fjor på å trena seg oppatt etter skaden, og såg frem til ein ny sesong med Sogndal. Då han signerte for eit nytt år i oktober, vart det også avtalt at han skulle få gå om det kom ein større klubb som ville ha tenestene hans. No får han sjansen i ein klubb der alt ligg til rette for at han skal ta nye steg som fotballspelar.

- Det er trist å reisa frå Sogndal, her har eg hatt det veldig fint, sa ein litt rørt Psyché då han var innom og henta tinga sine tidlegare i veka.

- Eg har vore her lenge no, lenger enn nokon annan plass eg har vore som fotballspelar. Det er ikkje lett å dra herifrå for siste gong. Det er mykje eg vil sakna, seier den veldig sympatiske guten frå Frankrike.

I Tsjekkia får han ikkje berre vera fotballspelar, men han får meir tid i lag med familien. Sambuaren og den vetle dottera blir med.

Me ynskjer Christophe og den vetle familien hans mykje lukke til i Tsjekkia, og takkar for suveren innsats!