Ny sørlending har signert

Sogndal Fotball og Sandnes Ulf er samde om ein overgang for Eirik Schulze (f. 7. januar 1993).

Avtalen med Eirik er signert, og strekkjer seg ut 2019-sesongen.

24-åringen kjem frå Mandal, og er midtbanespelar. 

- Me er veldig glade for å få Eirik til Fosshaugane. Han er ein løpssterk og hardtarbeidande midtbanespelar som er ung og har ambisjonar, seier sportsleg leiar Håvard Flo.

Eirik spelte for moderklubben Mandalskameratene før han i 2012 gjekk til Viking. Der fekk han tre kampar i Tippeligaen, den eine var mot Sogndal då siddisane vann 4-1 på Viking Stadion.

Turen gjekk så vidare til Strømmen, der han spelte under trenar Espen Olsen i to sesongar. I Strømmen hadde han stor tillit og spelte 58 obligatoriske kampar og noterte seg for 10 nettkjenningar. Han spelte begge kampane mot Sogndal, då me møtte Strømmen i 2015.

I fjor spelte han i Sandnes Ulf. Det vart 31 kampar og 3 skåringar for dei lyseblå.

- Eirik er ein fin type, snill utanfor bana, men ein terrier i kamp. Han vil gå fint inn i den gruppa me har her no, fortel Flo.

Mandalsguten kjenner godt Martin Ramsland frå før, og gler seg til å ta fatt her i Sogndal.

- Eg kjem hit for å etablera meg som Eliteserie-spelar. Eg har ambisjonar om å spele meg inn på laget, seier Eirik, som etter eit kort opphald i Sogndal reiste tilbake til Sørlandet for å pakka sakene sine. Han kjem tilbake over helga og er klar til treningsoppstart på tysdag.

Me ynskjer Eirik velkomen til Sogndal!