Bli med på folketog frå kulturhuset til Fosshaugadn!
Sogndal folkehøgskule inviterer alle i Sogndal til å gå saman med dei i tog til kampen mot Vålerenga!
Sogndal folkehøgskule ønskjer å skape engasjement før årets siste heimekamp! No inviterer dei alle i Sogndal til å gå saman med dei i tog frå Kulturhuset og opp til Fosshaugadn! Me håpar mange ønskjer å bli med på dette flotte initiativet!
På laurdag kl. 16:00 møter me Vålerenga på Fosshaugane Campus. Det er årets siste kamp, og me håpar du vil vera med på publikumsfesten. Me sikra plassen med sigeren mot Kongsvinger i førre runde, og no skal me avslutte sesongen med ein siger på heimebane! Klokka 15:00 kan ein vera med å gå i fakkeltog frå Kulturhuset i Sogndal sentrum og opp til Fosshaugane Campus på kampen! Alle er hjarteleg velkomne, og me håpar mange har lyst å vera med!
Ole Karsten Birkeland, rektor på Sogndal folkehøgskule, fortel at det er viktig for skulen å støtte Sogndal Fotball og at dei vil skape folkefest i årets siste kamp:
- Tanken er at me ønskjer å bidra til å lage folkefest! Me har lyst å støtte Sogndal Fotball og å vera ein del av laget. Det er viktig for oss å støtte fotballen som er utruleg viktig både for skulen og for heile bygda. Skulen vår er heilt avhengig av at Sogndal Fotball held seg i dei to øvste divisjonane, og me ønskjer å ta med elevane på kamp oftare i tida framober. No er planen å skape ein skikkeleg folkefest til den siste kampen i år!
- Eg er alt for dårleg til å reise på fotballkamp sjølv, så no er nyttårsforsettet mitt å reise på kamp oftare. Fotballen er så viktig for Sogndal at me må støtte opp, og eg oppmodar andre til å gjere det same, fortel han.
Folkehøgskulen stiller med samtlege elevar i toget og håpar at fleire har lyst å vera med. Birkeland utfordrar også sine rektorkollegaar i Sogndal til å ta med elevane sine på kamp:
- Me tek med alle elevane våre og blir rundt 50 stykk. Eg utfordrar mine rektorkollegaar i Sogndal, på Trudvang, på Kvåle, på VGS og på Høgskulen, til å stille med elevane og alle fotballinteresserte i toget og på kampen!
Bli med på toget, ta med deg alle vennar og familie og bli med på kamp!
STAO NO PAO!
