Emanuel er klar

Sogndal Fotball og Kjelsås IL Fotball er samde om ein overgang for Erik Emanuel Longe Grønner (f. 18/2 2001). Osloguten har skrive ein kontrakt som gjer han til Sogndalspelar ut sesongen 2024.

Emanuel har allereie vore med oss ei stund, då i to perioder. Først var han med då me slo Hødd i Sognahallen, deretter vart han med på treningsleiren i Marbella.

- Dette er ein spennande spisstype med mykje kraft og fart, en spelar det vil bli interessant å utvikla vidare, seier Håvard Flo.

- Etter to opphald med gjengen, la Oslo-guten att eit veldig godt inntrykk, held Flo fram.

Emanuel kjem frå ein idrettsfamilie i Oslo der han og lillesystera tidleg fekk interesse for ski og fotball. Han var i den tradisjonsrike klubben Lyn til han som femtenåring prøvde seg i ungdomsavdelinga i Vålerenga.

Han var så på utlån til barndomsklubben og debuterte med vaksenfotball for Lyn i PostNord-ligaen.

- Det var fint å vokse opp på Tåsen i Oslo. Det gjekk mykje i idrett, spesielt fotball. Frå eg var tolv var eg bestemt på å satsa for å bli ein god fotballspelar, seier Emanuel.

Før 2021-sesongen vart det overgang til Kjelsås, der han spelte vårsesongen. Han var på utlån til Bærum under haustsesongen.

Dei neste åra skal me få sjå han i Sogndalstrøya.

- Eg er veldig glad for å vera her. Det var eit lett val for meg å ta då Sogndal kom på bana, då eg veit at eg her kan utvikla meg vidare, seier spissen som legg til at det blir spennande å få jobba med trenar Tore André Flo.

- Han veit kva som skal til for å bli ein god spiss, eg håpar eg skal få lært mykje av han.

Det har vore ein fin dialog og ein god prosess rundt overgangen mellom Kjelsås og Sogndal, og Håvard Flo takkar for samarbeidet.

- No når Emanuel skulle ta steget vidare, er me veldig glade for at han valde oss, det det var i konkurranse med andre interesserte klubbar, smiler Flo.

Me gler oss til å bli betre kjent med Emanuel! Velkomen til Sogndal!