Nundal-hattrick og god start på haustsesongen for Sogndal 2!

Det vart ein god start på haustsesongen for Sogndal 2 i dag. I heimekampen mot Høyang vann dei til slutt 6-2, og sikra 3 nye poeng i Kretsligaen! Måla vart scora av Joakim Nundal x3, Andreas Kalstad, Viljar Stavø og Jesper Robertsen!

Kampen byrja med eit smell, og allereie etter 1 minutt låg ballen i mål. Joakim Nundal blei spelt igjennom på flott vis, og åleine med keeper var han sikker. 2-0 kom allereie etter 4 minutt, og denne gongen var det Andreas Kalstad sin tur. På eit frispark frå utsida av 16-meteren stilte Isaac Twum og Andreas Kalstad seg opp. Sistnemnde gjekk for ein lur variant og banka ballen inn ved næraste stolpe. 2-0 etter berre 4 minutt spelt, og ein skikkeleg pangstart på haustsesongen.

Når det var spelt 22 minutt var Joakim Nundal frampå igjen. Eit flott gjennomspel frå Viljar Stavø gjorde at Nundal fekk ein enkel jobb åleine med keeper. Her var spissen like sikker som i starten på kampen og auka leiinga til 3-0. Høyang reduserte til 3-1 etter 31 minutt spelt, og det var også stillinga til pause.

Etter pause byrja heimelaget på same måte som i fyrsteomgang. Viljar Stavø satte ballen i mål på vakkert vis før det var spelt 2 minutt av andreomgang. Frå utsida av 16-meteren curla han ballen elegant opp i krysset. Høyang skulle redusere nok ein gong, og etter 67 minutt spelt scora Joakim Sjøthun Måren sitt andre for dagen. Toppscoraren i Kretsligaen står no med 18 mål.

Heimelaget var ikkje ferdige for dagen, og på 3 minutt kom dagens to siste scoringar. Etter 71 minutt spelt scora Joakim Nundal hattrick etter ein flott lobb over keeper. 3 minutt etter var det duka for debutscoring frå Jesper Robertsen. Tromsøværingen heada inn 6-2 via stolpen etter ein corner. Det vart ingen fleire mål, og kampen enda med 6-2-siger for Sogndal 2.

Neste kamp for Sogndal 2 er borte mot Førde 2. Kampen spelast tysdag 27. august kl. 19:00. Allereie no på torsdag skal den same gjengen i aksjon for Sogndal G19. Då er det duka for heimekamp mot Molde i NM, og me håpar folk tek turen til Fosshaugadn! Kampstart er klokka 16:00!

STAO NO PAO!