Hintsa scora hattrick då Sogndal 2 vann mot Stryn!

Det enda med nok ein siger for Sogndal 2 i kveld. Stryn tok leiinga, men kampen vart raskt snudd og det stod til slutt 5-1 på tavla. Det betyr 3 nye poeng og ei god kjensle etter siste kamp før ferien!

Dette var laget som starta dagens kamp:

Magnus Stær-Jensen, Johannes Konstali-Lødemel, Emmanuel Olugbe, Mathias Øren, Sander Aske Granheim, Havila Bonabandi, Marius Årøy, Isaac Twum, Andreas Kalstad, Oliver Hintsa og Viljar Stavø.

Det var bortelaget som scora det fyrste målet, og det kom på ein litt spesiell måte. Keeper Magnus Stær-Jensen vart liggande nede etter ein duell i 16-meteren. Ballen var framleis i spel, og Stryn sin Ola Holmlund Ørjasæter tok den med og satte ballen i ope mål. Til tross for protestar vart målet ståande.

Sogndal 2 kom raskt tilbake og etter 29 minutt var det Havila Bonabandi som banka til. Skotet gjekk via tverrliggar og i mål. 1-1 og heimelaget var i gang. Berre nokre minutt etter kom leiarmålet. Marius Årøy spelte gjennom Oliver Hintsa på høgresida av 16-meteren. Spissen vendte om og banka ballen i mål til 2-1. Og like før pause kom det endå eitt. Flotte kombinasjonar sendte Sander Aske Granheim fri på venstresida. Venstrebacken la ballen ut til Oliver Hintsa som satte inn sitt andre mål på 4 minutt. Dermed stod det 3-1 til pause.

I andreomgang var det duka for fleire scoringar, og Viljar Stavø skulle sjølvsagt vere involvert. Etter 55 minutt spelt vart han takla av keeper i 16-meteren og dommar Tommy Skjerven peika på straffemerket. Der er Stavø sikker som banken og satte enkelt inn 4-1. Spisskollega Oliver Hintsa var ikkje ferdig for dagen og etter 77 minutt spelt kom hattricket. Sander Aske Granheim var nok ein gong servitør og la den perfekt til rette for svensken. Ei kontrollert avslutning gjorde at det enda 5-1 til Sogndal 2 over Stryn. Måla ser du her:

No ventar ein liten ferie for Sogndal 2 og resten av Kretsligaen. Dei neste kampane går 10. august.

STAO NO PAO!