Klar for Eliteserien

Sogndal Fotball og Sarpsborg 08 er samde om eit sal av Joachim Soltvedt.

Joachim har slutta seg til sine nye lagkameratar allereie, i klubben med ei rekkje Sogndal-vener som Tom Freddy Aune, Ole Jørgen Halvorsen og Bjørn Inge Utvik. Han har skrive under på ein tre-årig avtale, og vil nok bli ein populær kar for gjengen i Fossefallet.

- Eg ser på Sarpsborg som ein veldig spennande klubb. Dei hadde rett nok ein tøff sesong i fjor, men har dei siste åra levert meget solide sesongar, både med Europacup-eventyr og i toppen av norsk fotball, seier ein glad Joachim Soltvedt.

Sogndal Fotball ville ha mannen med den slepne venstrefoten med vidare, men har forståing for at Soltvedt ynskjer å ta denne sjansen han no får i Sarpsborg 08.

- Sarpsborg virker som ein godt dreven klubb med gode verdiar og moglegheiter for å utvikla seg som fotballspelar og menneske, seier ein audmjuk Joachim, og legg til at det ikkje er berre-berre å reisa frå Sogndal.

Soltvedt kom til Sogndal i sommaren 2017 og har spelt 63 kampar og skåra 13 mål i kvitedrakta.

I hans siste opptreden var han kaptein, det var no i treningskampen mot Tromsø.

- Det er sjølvsagt vemodig å forlata Saftbygda etter to og eit halvt år! På ein så liten plass blir ein glad i menneska ein treffer kvar einaste dag!

Joachim vil takka bygdafolket og dei i klubben for ei fin tid i lag.

- Eg sit att med masse gode minner eg har hatt i lag med lagkameratar, trenarar, støtteapparat og andre i og rundt klubben! Til neste år møtast me att i Eliteserien, avsluttar Joachim Soltvedt.

Det er veldig kjekt at nok ein Sogndal-spelar er klar for nye oppgåver i ein betre liga! Me takkar Soltvedt for fine år i lag og ynskjer han lukke til i Sarpsborg!