Marius Årøy har signert proffkontrakt!

Sogndal Fotball og Marius Årøy, 19. april 2005, er samde om ein avtale som strekkjer seg ut 2026-sesongen.

Marius har vore Sogndalspelar heile livet, og gått gradene gjennom aldersbestemte lag og vår eiga utviklingsavdeling. Dei siste åra har han vore ein del av B-lista, og difor også tett på A-laget. Samtidig har han vore kaptein for Sogndal 2/G19 og ein leiarfigur for eit ungt lag. Mange år med hard jobbing har no løna seg, og me er glade for at ein ny sogndøl tek steget opp i A-lagstroppen.

- Det er ei veldig god kjensle å signere kontrakt. Dette har eg jobba for i mange år, og det har vore den store draumen heile livet. Det er veldig kjekt å få vera med på denne reisa med Luis som sjef. Det har vore ein lang veg heilt frå laurdagsakademiet, via laga i guttefotballen og fram til Nils Tore og Patrik tok meg inn i Sogndal 2-stallen, fortel Årøy.

Marius fekk debuten for A-laget mot Brann i 2022. Totalt har han 7 offisielle kampar for A-laget, der 4 er i NM og 3 er i OBOS-ligaen. Han har spelt mykje i treningskampane i vinter, og vore ein viktig bidragsytar på treningane til A-laget. Den siste tida har han tatt store steg, og no har han endeleg fått sin fyrste proffkontrakt!

- Det var stort å i det heile tatt vere i troppen til den kampen, spesielt sidan det var mot Brann på eit fullstappa Fosshaugane. Det var gåsehud i 90 minutt. Når eg fekk beskjed om at eg skulle inn var det vanskeleg å tru at  det var ekte. Fyrst etter kampen byrja det å gå opp for meg kva eg hadde opplevd, fortel han.

- Eg fekk vere med å trene med A-laget for fyrste gong under Tore André Flo. Dei siste åra har eg vore med på mykje, men samtidig vore litt på utsida. I byrjinga var det veldig spennande å få trene med A-laget, og det var eit heilt nytt nivå for meg. Det var nytt å få spele mot eldre folk, og å vere ein del av ei gruppe med mange ulike kulturar. Dei meir rutinerte spelarane var flinke til å ta vare på meg, og sørga for at eg hadde det bra, held han fram.

Det er lov å drøyme stort, og i Sogndal kan draumane bli verkelegheit. I 2017 var det Marius sjølv som drøymde, og i dag passar det fint å trekke fram denne videoen igjen:

Patrik Karoliussen er ein av dei som har fulgt Marius tettast, både som hovudtrenar for Sogndal 2, men også gjennom rolla som toppspelarutviklar. Han fortel om ein spelar som verkeleg har jobba hardt gjennom mange år:

- Marius har vore ofte tilgjengeleg, kunne trent mykje og ofte over lengre tid. Han har kome litt gjennom i det stille, og bygd seg ein tydeleg karakter og mentalitet. Eg veit at det har vorte jobba mykje med Ole Erik Grinde, iallefall dei siste 3 åra. Gjennom denne perioden har han mange treningar med A-laget, og no har han også teke store steg på det fysiske. Det er fantastisk å sjå at han no har tatt eit lite knepp opp, og at han har kjempa seg til ein proffkontrakt, fortel han.

- Eg har kjent Marius lenge, og sett han i veldig mange kampar. Han er ein veldig ærleg og hardtarbeidande spelar, som ikkje alltid får mest skryt og merksemd. Han er ballsikker, har god forståing av spelet, orkar mykje og er verkeleg heil ved. Eg synst dette er ekstra stas, og eg veit kor mykje jobb som ligg bak. Det er ei fantastisk historie, men samtidig har me vore klar på at det er no den verkelege jobben byrjar. No får han igjen for strevet, og tillit til at han kan fortsette å jobbe hardt over tid for å ta nye steg, understrekar Karoliussen.

Hovudtrenar Luis Pimenta er tydeleg på at Marius verkeleg har gjort seg fortent til proffkontrakt, og er glad for at han no blir eit permanent tilskot til gruppa:

- Når me starta i januar trente Marius veldig bra. Han hadde nok eit sterkt ønske om å vise at han fortjente å vere ein del av gruppa. Han trent bra, fekk moglegheita til å starte fleire kampar og gjorde det bra i desse. Det er ein realitet. Han leverte også målpoeng tidleg i oppkøyringa. Inn mot seriestart har konkurransen på midtbana auka, noko som har gjort at det har blitt mindre speletid i dei siste kampane. Han har allikevel utvikla seg mykje sidan januar, og både kapasiteten hans og posisjonen i gruppa har betra seg. Me synst utan tvil at Marius er eit bra tilskot til gruppa, fordi han gjer at nivået vårt blir betre. Han jobbar hardt, har bra teknisk nivå og ein taktisk forståing som hjelper han mykje. Han forstod spelmodellen vår veldig fort, og det er lovande for utviklinga hans, fortel Pimenta.

Marius sjølv fortel at Luis har bidrege til at han har klart å ta det siste steget:

- Målet har alltid vore å kjempe seg inn i stallen, og å få den fyrste proffkontrakten. Eg føler at eg har vore nærme ved fleire høve, men at eg akkurat ikkje har klart å ta det siste steget. Etter at Luis kom inn har eg frå fyrste sekund følt på ein enorm tillit. Eg var litt usikker på korleis vegen vidare kom til å bli sidan eg ikkje lenger kunne stå på B-lista. Luis har gitt meg den tida og tilliten eg trengte, og eg har fått mange sjansar gjennom vinteren. No føler eg at det har løysna litt og at eg har klart å ta sjansen. Det er veldig deilig å bli eit fullverdig medlem av gjengen.

Ein viktig person i Marius si karriere har vore vår tidlegare kollega Ole Erik Grinde. Han jobba blant anna som mental trenar i klubben før han omkom i ei jaktulykke i fjor haust. Både Marius og Patrik Karoliussen trekkjer fram arbeidet hans som heilt avgjerande for at Marius no har tatt steget opp til A-laget:

- Forholdet mellom meg og Ole Erik har vore ekstremt viktig. Han skal ha mykje av æra for at eg har klart å ta det siste steget. Han har lært meg utruleg mykje, og vore veldig viktig for meg, fortel ein kjesleladd Årøy.

- Å snakke om det no får meg til å mimre tilbake til tusenvis av timar saman med Ole Erik der me har diskutert ulike spelarar. Marius har vore ein av dei me har jobba mykje med. Det er litt emosjonelt å snakke om det no, men eg veit at arbeidet hans har vore viktig, fortel Karoliussen.

Ansvarleg for spelarlogistikken, Håvard Flo, fortel at det er kjekt også for klubben at ein ny lokal spelar tek steget opp:

- Det at Marius no blir ein profesjonell spelar hjå oss, og sluttar seg til A-lagstroppen permanent, synst me er både fortjent og veldig stas for klubben. Marius har gått gradene i moderklubben og bidrege heile vegen med sin fine innstilling. Han har hausta mykje ros frå ulike trenarar for sin dedikasjon og tolmod. Me føler oss trygg på at Marius er klar for å ta steget opp, då han over lengre tid har vore ein del av troppen i både trening og kamp, fortel Flo.

Me gratulerer Marius med sin fyrste proffkontrakt og håpar å sjå mykje frå han dei kommande sesongane! No gler me oss til årets fyrste kamp på Fosshaugane Campus, og me håpar å sjå deg der!

Kjøp billett her!

STAO NO PAO!