Rekordsal: Edmund Baidoo til RB Salzburg

Sogndal Fotball og Fußballclub Red Bull Salzburg er samde om ein overgang for angrepsspelar Edmund Baidoo, f. 30. januar 2006.

Edmund kom til oss før årets sesong, og det var ein spent gut som møtte oss i Oslo på veg til treningsleiren i Spania. I løpet av vekene på prøvespel i Spania vart det rask tydeleg at han var ein særs talentfull spelar. I tillegg til å gjere det bra på bana var han også ein flott gut utanfor bana, og ein bestemte seg for å kjøpe han frå den ghanesiske klubben Asanska Football Club.

Edmund spelte sin fyrste offisielle kamp for Sogndal i møtet med Vålerenga på Intility. Allereie her viste han kva kvalitetar han har, og når det var spelt 37 minutt slo han ein perfekt målgivande pasning til Erik Flataker. I dei tre neste kampane scora han mot både Mjøndalen, Førde og Åsane, i tillegg til å vera ein underhaldande spelar å sjå på. På 22 kampar for Sogndal står han no med 10 mål og 4 målgivande pasningar. Edmund vart raskt ein favoritt på Fosshaugadn, og interessa frå andre klubbar auka for kvar kamp han spelte. No er klubbvalet tatt, og Edmund held fram karriera si i Austerrike.

- Eit sal som dette er viktig for Sogndal Fotball og vil trygge og skape ro rundt drifta. No kan me sjå framover og lage planar som ivaretar klubb og den sportslege satsinga dei kommande åra. Dette skapar også rom for å jobbe vidare med dei prosessane klubben allereie har satt i gang. Økonomien i denne avtalen er så stor at det blei eit strategisk riktig val å gjennomføre salet, fortel dagleg leiar Gisle Olsen.

Red Bull Salzburg er ein austerrisk klubb som spelar i toppdivisjonen i Austerrike. Dei har vunne serien 17 gonger, og den Austerriske cupen 9 gonger. Dei siste seks sesongane har klubben kvalifisert seg til gruppespelet i Champions League, og Edmund får moglegheita til å vise seg fram på det absolutt høgaste nivået i den kommande sesongen. Red Bull Salzburg er ein klubb som har fostra fram mange store stjerner, og er eit godt springbrett til større klubbar i Europa. Spelarar som Sadio Mané, Erling Braut Haaland, Dominik Szoboszlai, Dayot Upamecano, Hwang Hee-Chan og mange fleire har alle tatt steget via Austerrike på vegen til toppen. No er det opp til Edmund å ta nye steg i karriera.

Sportssjef Terje Skjeldestad fortel at me sjølvsagt ønskte å behalde Edmund lenger, men at det er naturleg at han no går vidare til eit høgare nivå:

- Det er heilt naturleg at han går vidare no, sjølv om det er litt sårt for alle som er glade i Sogndal. Me er veldig glade for det han har bidrege med og sjølvsagt det han legg igjen. Han har vist at det er mogleg å gå frå vesle Sogndal til store klubbar. Det er eit skikkeleg klapp på skuldra til alle som har bidrege til utviklinga hans.

- Me var ganske sikre etter nokre treningar på treningsleiren at dette var noko for oss. Edmund viste raskt at han hadde nokre spennande kvalitetar. Han har verkeleg teke OBOS-ligaen med storm, samtidig som at han har vore heldig med timingen. At han fekk treningskampane i oppkøyringa som ein mjuk overgang til eit nytt land har vore optimalt. Edmund har hatt ein veldig fin utvikling etter at han kom til oss, og det er eit tegn på at ein har gjort mykje riktig. Han er heilt klart ikkje den same spelaren, og potensialet er enormt, legg Skjeldestad til.
 

Håvard Flo er ansvarleg for spelarlogistikken i Sogndal Fotball. Han står for dialogen med klubb og agent, og fortel at fleire store klubbar har konkurrert om signaturen til Edmund:

- Det at Edmund no reiser frå oss vitnar om det me såg når han kom for nokre månadar sidan. Han viste eit nivå og ein eigenart som forsterka tankane våre om at Edmund kanskje ikkje ville bli så lenge hjå oss. At Salzburg no kjøper han i sterk konkurranse med andre større klubbar vitnar om kvaliteten han innehar og den flotte utviklinga Edmund har hatt hjå oss på denne korte tida. Dette er ei stor fjør i hatten for alle som er tett på Edmund kvar einaste dag på treningsfeltet, i garderoben, i klubb og bygda forøvrig.

Sportssjef Terje Skjeldestad fortel om planane for overgangsvindauget, og at det vil komme eit par nye spelarar i løpet av dei siste dagane før fristen:

- Å erstatta Baidoo er umogleg, men me jobbar med å fylla holet han etterlet seg. Kasper Skaanes og Óskar Borgþórsson er tilbake frå skadane sine, så me har alternativ, men ønskjer å styrke oss ytterligare. Me jobbar kontinuerleg med å få inn nye spelarar, og planen er at ein vil sjå eit par nye fjes før vindauget stengjer.

Me ønskjer Edmund masse lukke til vidare på reisa, og gler oss til å følgje med på kor langt han kan nå. 

STAO NO PAO!