Surt tap mot Stabæk

Det enda med 2-3-tap i ein innhaldsrik kamp mot Stabæk. Oliver Hintsa sendte oss i føringa før det var spelt 1 minutt, før Stabæk snudde kampen. Etter pause utlikna Martin Høyland til 2-2, men Stabæk trakk det lengste strået og sikra 3 poeng på slutten av kampen.

Me fekk ein pangstart på kampen når Oliver Hintsa sendte oss i føringa før klokka hadde passert 1 minutt. Eit frispark frå Jacob Blixt Flaten fann Daniel Arrocha på bakerste stolpe. Kapteinen stanga ballen på tvers, og framfor mål venta Oliver Hintsa som heada ballen i nettet! 1-0 og ein pangstart på kampen.

Karadn fortsatte å køyra over bortelaget og skapte fleire enorme sjansar. Redning på strek, stolpetreff og blokkeringar gjorde at det ikkje stod 2-0 på tavla tidleg i kampen. Istaden var det Stabæk som utlikna etter 14 minutt spelt. Skotet frå Oskar Spiten-Nysæter vart fyrst blokkert, men returen banka han inn på volley. 1-1 på ein av få moglegheiter for bortelaget.

Til tross for nye sjansar for heimelaget var det igjen Stabæk som var effektive. Ein pasningsfeil i forsvaret vart fanga opp av Stabæk sin fyrste målscorar. Frå midtbana gjorde han jobben sjølv og like utanfor 16-meteren banka han ballen forbi Lars Jendal. Eit effektivt bortelag leia difor 1-2 til pause.

Etter kvilen var det bortelaget som styrte kampen. Fyrst midtvegs i omgangen byrja karadn å ta over, og utlikninga kom i det 73. minutt. Edmund Baidoo svinga rundt med Stabæk ute til høgre og la inn framfor mål. Stabæk klarerte, men på 16-meterstreken stod Martin Høyland og banka ballen i mål på volley. 2-2 og me var tilbake i kampen.

Diverre var det bortelaget som skulle avgjere kampen, og i det 83. minuttet kom vinnarmålet. Stabæk rulla opp eit angrep til høgre, og la ballen ut til 16-meteren. Der venta Thomas Roberts som plasserte ballen fint inne ved stolpen. Dermed stod det 2-3, og det enda med eit surt tap på Fosshaugadn.

Tusen takk for støtta til dei som var på Fosshaugadn i dag! Me håpar de kjem igjen allereie neste søndag når me tek i mot Egersund på heimebane. Kampen spelast søndag 9. juni klokka 17:00. Då skal me tilbake på vinnarsporet!

STAO NO PAO!