Velkommen Ronney Onyango Otieno!

Sogndal Fotball og Gor Mahia FC er samde om ein overgang for forsvarsspelar Ronney Onyango Otieno, f. 8. august 2001! Avtalen strekkjer seg ut 2027-sesongen.

Kenyansk landslagsspelar

Ronney Onyango Otieno er ein kenyansk høgreback, som spelar for det kenyanske landslaget. Han har tidlegare spelt for Wazito FC og Gor Mahia som begge ligg i heimlandet Kenya. Gor Mahia spelar i Kenyansk Premier League, og er eit av dei beste laga i landet. Ronney har vore med å vunne ligaen og Community shield i tillegg til å spele Afrikansk Champions League for sin tidlegare klubb. Her møtast alle dei beste klubblaga i Afrika.

I slutten av februar, etter årets treningsleir, var Ronney på prøvespel i Sogndal. Han sat på benken mot Lyn, starta mot Hødd, var med til Ålesund og starta igjen i kampen mot Stabæk. Gjennom fleire veker på trening og i treningskampane gjorde han sakene sine godt, men i midten av mars reiste han på landslagssamling. Der spelte han 2x 90 minutt i VM-kvalifiseringa for Kenya. Kampen mot Gambia enda 3-3, og Ronney vart kåra til banas beste spelar, medan det vart 2-1-tap mot Aubameyang og Gabon. No er han tilbake i Sogndal, og me kan endeleg presentere han som vår nyaste signering! 

- Det var kjekt å kome til Sogndal på prøvespel. Eg følte meg som heime frå fyrste sekund, og alle i klubben var fantastiske mot meg. Lagkameratar, trenarapparat og alle rundt var veldig venlege og hjelpsomme, fortel Ronney.

- Det er veldig stort å signere kontrakt, og eg er veldig glad. Eg hadde veldig lyst til å kome til Sogndal etter prøvespelet, og no er det berre å fortsette å jobbe for å bli betre. Eg gler meg til å kome i gang og å utrette ting saman med laget, seier han med eit stort smil.

God prosess saman med gamal kjenning

Ansvarleg for spelarlogistikken, Håvard Flo, fortel om ein god prosess saman med ein gamal kjenning av klubben:

- Me er alle særs glade for at Ronney er klar for Sogndal Fotball. Kvalitetane hans vil utfylle spelartroppen på ein fin måte. Me har fått på plass ein spelar som har gode kvalitetar både offensivt og defensivt, og ikkje minst god erfaring på toppnivå.

- I prosessen med å få dette til har mange bidrege, og me vil rette ein spesiell takk til Akeem Latifu, som identifiserte Ronney for oss tidleg i vinter. Det at me kan nytte oss av Akeem sitt kontaktnett vil vere ein styrke for oss både i notid og i framtid, fortel Flo. 

Bra prøvespel

Luis Pimenta fortel at han likte det han såg under perioden Ronney var på prøvespel, både på og utanfor bana:

- Han kom inn døra smilande, jobbar knallhardt og er audmjuk. Han har mange av karakteristikkane me har leita etter, og bidreg positivt i gruppa. Dette blir hans fyrste Europaeventyr, og me skal gjere alt me kan for at det blir ei fin reise for han. Han er også landslagsspelar for Kenya, og har mykje erfaring med fotballen på det afrikanske kontinentet.

- Ronney har vore med oss over ein lengre periode, og fekk blant anna spele frå start mot Stabæk. Der viste han seg fram på ein god måte, men totalvurderinga har også lagt stor vekt på alle dei treningane han har hatt med oss. Han er ein spelar med god fysikk, og viste mot Stabæk at han har gode kvalitetar som fyrsteforsvarar. Han har eit potensiale for å bli ein veldig god høgreback, fortel Pimenta.

Ronney fortel at han trivest i Sogndal, sjølv om det er ein stor kontrast frå landet han kjem frå:

- Det er ein kald plass, men eg likar Sogndal godt. Det er roleg og fint her, og det et enkelt å fokusere på fotballen. Eg kjem i frå hovudstaden i Kenya der det bur fleire millionar menneske, så det er heilt klart noko nytt, ler han.

Heidrar sin avdøde far med draktnummer

Ronney kjem til å nytte eit ganske uvanleg draktnummer, og forklaringa er av den rørande sorten. Ronney er fødd på nøyaktig same dato som sin far, 8. august, og datoen 8.8 vart heilt spesiell for dei to. Når far gjekk bort valde Ronney å spele med nr. 88 på ryggen:

- Eg valde å spele med nummer 88 for å heidre min far etter at han gjekk bort. Eg spelar for han, og det kjennest godt å ha han med meg på bana. Eg er sikker på at han er stolt av meg i dag, fortel han.

Ronney er speleklar allereie på laurdag, og kan få sin offisielle debut mot Aalesund. Me håpar å sjå deg på tribuna i årets fyrste kamp på Fosshaugane Campus!

Kjøp billett her!

STAO NO PAO!