Runde 26: Sogndal - Aalesund

Morten Kalvenes leiar Sogndal i sin fyrste kamp når Kjetil Rekdal og Aalesund kjem på besøk. Begge lag treng poeng, og det blir ein ny tøff kamp i OBOS-ligaen.

Aalesund har hatt ein tung sesong i OBOS-ligaen etter nedrykket frå Eliteserien. Christian Johnsen byrja sesongen som hovudtrenar, men før sommarpausen vart ein einige om å avslutte samarbeidet. Kjetil Rekdal tok over og har fått i oppgåve å redde plassen i OBOS-ligaen. Status etter 25 spelte kampar er 14. plass på tabellen og 25 poeng. Det er særs tett mellom laga, og kvart poeng kan bli heilt avgjerande når det skal tellast opp etter sesongen.

Midtbanespelar Håkon Butli Hammer er toppscorar for Aalesund med 6 scoringar. Claudio Braga og Sander Hestetun Kilen har begge scora 4 mål og følgjer like bak på toppscorarlista. Dei to sistnemnde toppar også oversikten over flest målgivande pasningar.

Me feira fotballens nasjonaldag i Jugendbyen, og tok ein herleg 2-0-siger på Color Line Stadion. Det førte til tabelltopp på 17. mai og me var inne i ein særs god periode av sesongen. I haust har Aalesund auka poengfangsten, og me har diverre ikkje vore i form den siste tida. No er alt duka for ein tett og jamn kamp mellom to lag som må ha poeng.

Bli betre kjend med Morten Kalvenes her!

Me håpar å sjå deg på tribuna på laurdag! Etter ein veldig tung periode treng me verkeleg støtta frå dykk for å snu trenden. Saman skal me ta 3 poeng mot Aalesund, og få ein perfekt start i Kalvenes sin fyrste kamp på sidelinja!

Kjøp billett her!

STAO NO PAO!