Skapte mest, men tapte mot Start i serieopninga

Eit ungt og uredd Sogndal kasta seg ut av startblokkene på Sør Arena i dag. Det gav rask utteljing, og burde resultert i fleire scoringar, men heimelaget kom tilbake.

Allereie etter eitt minutt var karadn frampå, og ein spelte seg fri på venstresida. Oliver Hintsa satte fart inn i feltet, lurte keeper, og vart felt. Dommaren peika på straffemerket, og Erik Flataker satte den sikkert i mål. På same måte som i fjor opna han målkontoen i årets fyrste seriekamp.

Karadn fortsatte å køyre på, og hadde lenge god kontroll. Blokkeringar og gode redningar frå Start hindra at mange store sjansar vart fleire scoringar. Diverre kom baklengsmålet etter 33 minutt spelt, og det var grunna kommunikasjonssvikt årets fyrste baklengs kom. Mathias Øren vann duellen sin, og heada bak mot Daniel Sætren, samtidig som keeperen vår kom ut. Då fekk Mathias Grundetjern ein enkel jobb med å sette ballen i mål. Det stod 1-1 til pause.

I andreomgang vart det ein rask kalddusj. Allereie etter 51 minutt kom den avgjerande scoringa etter eit langt kast. Diogo Brás klarerte ballen vidare i feltet, medan Eirik Schulze stussa vidare til bakerste stolpe. Håkon Lorentzen fekk stå åleine og dunka ballen i mål på volley. 

Utover omgangen skjedde det lite, og ingen av laga kom til dei store sjansane. Mot slutten kom det allikevel ein sluttspurt, og kvarteret før slutt var Erik Flataker nære. På eit innlegg frå venstre var han fyrst på ball, men avslutninga gjekk like over. Også Emmanuel Mensah fekk fleire gode sjansar, men avslutningane fann ikkje vegen til nettmaskene. Alle i kvitt ropte også på straffe då Martin Høyland vart takla innanfor 16-meteren, men dommaren peika ikkje på straffemerket. Då enda det 2-1, og Start tek alle poenga.

Diverre er det ikkje sjansestatistikken som gir poeng, og karadn reiser tomhendt heim frå Kristiansand. Me grev oss ikkje ned av den grunn, og gler oss allereie til fyrste heimekamp! Aalesund kjem på besøk allereie på laurdag, og me jaktar årets fyrste siger! Tusen takk til dei som møtte opp på bortefeltet og ein spesiell takk til Emil Strand som reiste heilt frå Sogndal til Kristiansand for 3. år på rad! Imponerande!

No håpar me å sjå dykk på tribuna mot Aalesund på laurdag! Det blir ein ny kamp om poenga, og me skal gi alt for å ta årets fyrste siger!

Kjøp billett her!

STAO NO PAO!